ZRC Awging Lom 4, Hawm 11 (17-Oct-2015)

Tukaal Thulu Te Tomlakna (na etnop pen meek ziau le cin)
  1. USA Pan P3 Tawh Akisam Akua Mapeuh
  2. Zomi Ngeina Khuado Pawi Thu
  3. !!!MEMSA Pan In Micina Kepdan Khoi Dan (Health Care Providers Training) Om ding!!!
  4. Pasian Min Phat Khawm Ding In Kong Zawn Uh Hi
  5. ZRC Zum Ah Niik Leh Puan 2015 Latest Design Tuamtuam Hong Tungta
  6. Lungdam Kohna
  7. !!! Nasep !!!Nasep !!!Nasep !!!

USA ah om Unau-sanggam-Nu leh Pa te’n P3 tawh a kisamte tulai tak UN zum pan interview ding in ki samsam ta hi. P3 tawh akisai kha akua mapeuh in ki gin den ding leh phone hoih tak let ding kong zasak uh hi. Tua bek thamlo in ih case te, ih tangthu te lim tak hoih tak gen theih ding thupi mahmah ding hi.

Thu Masa
“Zogam gam sungah Khuado a kizat ciat hangin, lasak a kipan gamtatnate kibang kimlo hi. Bang hang hiam cih leh, omna mun kikhat lo ahih mah bangin ih omna mun tawh ki tuakin gam min, khua min, lui minte tampi-in phui-sam, lasak leh gamtatna-ah kizang ciat hi. A kibang lo nengneng a om hangin, “Khuado ngeina kician omlo hi, ci-a ngaihsut ding hilo hi. Khuado thu ih gen a kibat kim lohna zong a thupit mahmahna hi zaw hi, cih ih ngaihsut ciat ding ka deih hi.
Khua do pawi ih cih pen Zomite pawi neih thupi pen leh lim zat pen hi a, hih pawi pen tuuk annlak khit ciang kibawl ahi hi.

Khuado pawi bawl hun leh Vaite pawipi ‘Diwali Puja’ leh Kawlte pawipi ‘Mithuun Puai’ bawl hun kituak a, Khuado pawi ih bawlzia tawh kibat mahmahna nei-in mei kide tek hi. Kawl leh Vai ten ‘Khuaimeivak’ de-in, Zomite in ‘Meilah’ ih de hi. Hih panin Zomite minampite mah banga ngeina zia leh tong kicing a nei ih hih lam kilang hi.

Tua banga ngeina zia leh tong kicing a nei minam picing kihi napi’n, minam picing hong hisak ih minam pawipi Khuado ih neihna natawm a theilo tampi ki-om ding hi. Minam Pau, lai, ngeina, pawi leh khanglui vante kiciang a neilo te minam picing kici theilo ahihman in, a itlo, a keemlo, a puah lote minam khangto suak ngeilo hi.

(A) A Khiatna
Khua: cih in khiatna nam tuamtuam nei hi. Pasian genna- in ‘Khuavak’ kizangin, Dawite genna-in ‘khuazing’ kizang hi. ‘Do’ ih cih in zong khiatna nam tuamtuam mah nei-in, a sia lam leh a hoih lamin kizang khawm thei hi. Ih it ih ngaih hong zin hong lengla a om ciangin zindo, lengla do ci-in ‘Do’ zatna mun a om mah bangin, hong bawlsia thei dawi leh gaalte ih sim ciangin zong ‘Do’ ci- in kizang veve hi.

Zomite in’Pawi’ ih cih pen mikangte’n ‘Festival/Feast,’ ci-in, Vaite in Puja ci-in, Kawlte in puai na ci uh a, Luhseite in Kut na ci uh hi.

Hih ih Khuado pawi in thupha hong guan Pasian dona, lungdam kohna leh thupha ngetna pawi hi-in, A lang khat lamah hong bawlsia thei dawi leh kaute lak pan kisiansuahna dinga dawi leh kaute hawlkhia-a dona pawi ci leng zong ki khiallo ding hi.

(B) Kipatna
Khuado pawi ih neih zawh kum za guk peuhmah sawt khin dingin ki um hi. Khuado pawi pen khangthak ngeina zui-in Manipur gamah Tedim Chin Cultural Club makaihna tawh October 11, 1969 kumin Taang-nuam khua-ah zat kipanin, Mizoramah Zomi Society makaihna tawh November 12, 1994 kumin Sairang, Tlawnglui-ah kizang hi. Tuipi gaalkaai Zomi te’n Singapore Zomi Innkuante’ makaihna tawh 1995 kum panin Singapore khuapi-ah ‘Leitung Bup Zomi Khuado Pawi’ min vawhin zat hong kipan to-in, tu ciangin leitung bupa Zomite omna peuhah kizang kawikawi ta hi.

>>>>>>>>Zoplaiding<<<<<<<<

MEMSA Sang pen sang hoih mahmah khat hi aa, Cidamna lam tawh kisai kep dan khoi dan sinna ahi hi. Certificate (Laidal pi) zong hong kipia ding hi. Tua sang pan a ong peuhpeuh in US (America), Canada, United Kingdom ah khat peuhpeuh na tun ciang in zong cina kep tawh kisai in nasep hoih ki ngah thei ding aa, khasum zong hoih hi.

MEMSA Sang Akah Nuam Akua mapeuh ii theih ding:
  1. MEMSA sang pen Level in ki khen aa... Level 1 in Kha 6 sung sang kah kha ding hi. Level 1 zawh sial in certificate ki pia ding hi.
  2. Sang kah man Level 1 pen kha 6 sung hi aa, RM 500 hi ding hi. An leh Omna pia sa ahi hi.
  3. Akah nuam peuh mah in December 30, 20105 a nunung pen in ZRC zum ah min sayin pia aa Form nong fill up na ding ki sam hi.
  4. Sang kahna ding mun pen MEMSA Training Center, Bukit Beruntung ah hi ding hi.
  5. A tel beh nuam ih om leh ZRC zum ah nong kanna ding kong zasak uh hi.

Zomi Christian Assembly (ZCA) pawlpi te ii makaihna tawh October 30, 2015 (Friday) ni nitaak nai 9:00pm pan 11:30pm dong Grace convention Centre ah Pasian min phat khawm ziahziah ding in hong zawn uh hi. Zomi khempeuh pai kim ciat ding ngimna tawh mun tuamtuam, veng tuamtuam pan in bus om ding hi.

Thu gen (Speaker): Rev. Dr. Khai Suan
Special Guest: JK Kam, Mungpi (Idol)
 
        Amun: Grace Convention Centre
  Level 3, Mayang Plaza, SS 26/2
  47301 Petaling Jaya, Kuala Lumpur.
Kizopna ding: Sya Lianbawi: 018-240 7634
  Sya David: 018-355 0340
  Sya Thangta: 011-1639 5368

ZRC zum ah Zoniik, leh adangdang Niik leh Zaa puan, kawlgam kawl lukhu hoih nono 2015 latest design hong tungta hi. Alei masa ahampha hi ding hi. Niik leh puan alei nuam peuh mah in aman lang thei pen in nong pai na ding un thu hoih kong puak uh hi. Taman Sri Kuching ah zong om hi. Niik leh puan tawh kisai ki zopna ding Syamah Dimboih 011-271 87622

Tuithang khua pan ahi Shwe Pyi Tit (Sai) nei pa ahi Pa Tha Piang te innkuan in in Zomite a it avei na leh Pasian a zahtaakna tawh ZRC ading in RM 40 hong pia khia ahihman in ki lungdam mahmah hi.

Sunway pawlpi pan ahi Myanmar Believers Fellowship (MBF) in zong mi nam a itna leh Pasian a zahtaakna uh tawh ZRC zum ading in RM 100 hongpia khia ahihman in ZRC pan ki lungdam mahmah hi.

Muizawl Khua pan ahi Ko Munglay (Praise Garden Studio) te innkuan in zong Zomi a it avei na leh Pasian a zahtaakna uh tawh ZRC ading in RM 50 hongpia khia ahihman in ZRC pan in ki lungdam mahmah hi.

ZRC ii nasepna te thapia nuam ih om leh ZRC pan in lungdam tak in ki sang hi. Zomi ading sem khawm ni!

  1. KFC Ah Mimal 5 Kideih
  2. Cleaner Ding Pasal 2 Kideih
  3. Computer Tawh Kisai Pasal 2 Kideih
  4. Store Ah Pasal 1 Kideih
  5. Ansai Ah Pasal 3 Kideih

Tu sung teng pute (CID) uniform silhlo te ahi zong palik te tam mahmah ahihman in vak suk vak toh ki dawm ni. Adiakdiak in Sogo kiim teng, Kota Raya, Persar Sini Bus stand kiim teng ah om nuam deuh uh hi. Deih loh pen in Ki mat na tuah zenzen leh Sya Piang 012-776 3014, 012-622 2986, 018-257 2115 tung ah huhna ki ngen thei hi.

Zato, MC, Clinic pai na ah apai theilo te ahi zong, Pau leh ham theih loh man in kamphen aki sam ahi zong ih om leh Sya Khanpi 010- 972 0902 tungah huhna ki ngen thei den hi.

ZRC zum hon hun :
(Every day)
9:00am - 6:00pm
Email:
zrcmly@gmail.com
Fax/Tel:
039-224 7283
Download-ZRC Awging Lom 4, Hawm 11.PDF
at
Labels: , , , ,