ZRC Awging Lom 4, Hawm 07 (20-Sep-2015)

Tukaal Thulu Te Tomlakna (na etnop pen meek ziau le cin)
  1. UNHCR Zum Ah Kipawlna/Pawlpi Makaite Leh UNHCR Uliante tawh Kimu Khawm
  2. UNHCR Pan Chin State Pan Hongpai Gambeel Mite Tung Zaksakna
  3. Bank Account Ahong Nuam Akua Mapeuh
  4. ZRC Zum Ah Niik 2015 Latest Design Tuamtuam Hong Tungta
  5. Gupna Bucing Crusade
  6. Lungdam Kohna
  7. !!!Nasep!! Nasep!! Nasep!!!

September 14, 2015 (Monday) ni in UNHCR-CDU (Community Development Unit) te ii vai hawm siamna tawh UNHCR zumpi ah kipawlna/Pawlpi makaite leh UNHCR uliante tawh muh khopna ki nei hi. UNHCR pan hong genna vuah, gam 3na atung khin Chin state bup pan in mimal 16000 kiim hita hi cih thu hong gen uh aa, August 17, 2010 maa in UN card atawi khin hi na pi’n RST aki sam nailo akua mapeuh UNHCR zum ah a manlang thei pen in hong zasak un hong ci uh aa, tu aa tawh kisai in August 17, 2010 maa aa UN card/laidal atawi te ading in nunung sapna (last/final call) hi ding hi cih zong hong gen uh hi. UN zum ah ei mah leh ei mah va pai aa va kan theih zong ahi hi. Huhna aki sap leh ZRC tung ah zong huhna ki ngen thei hi.

August 17, 2010 maa UN card/laidal atawi khit zenzen hang zi/pasal thak nei (New Marriage), ki teeng tawm panpan aa, a zi/pasal thak te’n a UN card uh August 17, 2010 khit ciang a ngah pan te ahih leh a zi/pasal thak hang in gam 3na lam tawh kisai in vai poi tuam mahmah ding hi.

Ahi zong in tun ki teeng thak (New Marrried) hi mah ta se leh a zi leh a pasal tuak in UN card pen August 17, 2010 maa in na ngah tuak hi leh vai poi om tuanlo hi. August 17, 2010 maa UN a lut lai in innkuan min, zi leh ta a koihsa te ading in hong tun hun2 ki lutpih thei lel aa vai poi om tuanlo ding hi. Ahi zong in hun bel zakai tuam ding hi.

August 17, 2010 khit aa UN card ngahte ading in Group case hi nawnlo aa, ei mah mimal mahmah ki sam in na case dung zui in hong ki sit tel tangtang ta ding hi. Pawl khat te pen August 17, 2010 khit ciang UN card a ngah pan zenzen hang a case hang maw, ahih kei leh damlohna hang maw ahih kei leh vai tuamtuam hang in a leng khin na om zel veve hi. Ahi zong in August 17, 2010 khit zawh UN card ngah thak te’n gam 3na a lung ih om leh UNHCR ah ei mah ngiat in hong ki pulaak un cih hong vai khak uh hi. Hong sam pah ding cihna hi tuanlo aa, UNHCR pan Mrs. Charlele ii gen dan ahih leh 2018 ciang aki sam theih ding in sayin ah hong gual sak ding cihna hi lai hi.

Tune Insurance Tawh Kisai
Tunes Insurance tawh kisai in nasemte aki laih lai tak hi aa, tun Tune Insurance nasem khawm thak ahi MI Care in mawh puak hong laaksak ta ahihman in Tune Insurance tawh kisai in vai poi mawh na neih uh leh William (MI Care) -012-249 3397 tung ah na koh ding uh kong theisak uh hi.

Kawlgam khua hun ki khekna tawh kizui in Zogam ah thu kan te’n kan khiatna hong nei uh hi. Ki bawl siatna tawh kisai in Kawlgam ahi mun pawl khat te ah a omlai zenzen hang in Chin State (Zogam/Khamtung gam) a huam kim in a et ciang un ki bawl siatna mu nawnlo uh aa, ahoih lam in hong muh sak uh hi. Tua ahihman Kawlgam khua hun zui in Malaysia ah om UNHCR zumpi in hoih tak leh sit tel tak in na a sep dan dingte uh anuai aa bang ahi hi.

  1. Ei Zomi te pen ni dang in UNHCR pan in Zomi khempeuh pen gambeel mah hi [Persumption of eligibility (POE)] a cih thukimna pen 2014 ciang ki mang tase mah leh Kawlgam khua hun tawh kizui in tun Zomi khempeuh hi nawnlo ding hi ci in a thu khek ta uh hi.
  2. Tun UN zum pan nasep zia khempeuh ki laih aa, ni dang in Zomi khempeuh pen gembeel mi hi (POE) a cih pen uh POE taang in mimal hihna [Status Verification Procedure(SVP)] hih mi pa/nu ading a gam ciah kik leh lauh huai takpi mah ding hiam cih sit telna, tawh laih ta uh hi. A mi hon in hong ciap teh sak nawnlo uh aa a mimal in ciam teh ta uh hi.
  3. UN card/laidal ngah nailo Zomi akua mapeuh ading in nam dangte sang in hong ki deihsak masa nawnlo ding hi. Ahi zong in mimal ngiat thu hong sit tel (SVP) ding uh aa, UN card piak huai asak te bek pia ta ding uh hi.
  4. Khat peuhpeuh in UN card ngah khin mah tase leh a innkuan, zi leh ta, a u leh nau a ngah nailo te ading in innkuan ki khen hoihlo cih thu bek mah tawh UN card hong piaksak suaklai ding uh hi.
  5. UNHCR card ngahsa Zomite ading in UNHCR pan huhna te khak tanna nei tuanlo ding uh aa, ahi zong in ei leh ei din zawh/puuk lawh loh ding khop ciang lampi ki hon sak ding hi.
  6. Tua ahihman in UN card a ngah nailo Zomite ading in hong hamsa semsem ding hi cih zong UNHCR pan mu khol uh ahihman in Zomite ading in UNHCR te’n Malaysia kumpi tawh gambeel mi pan in Malaysia ah nasem mi ci’n ciap tehna a ngah theihna ding in ki kupna aneih lai tak zong ahi hi.

Gambeel mi UNHCR card atawi khin akua mapeuh in bank card ki bawl thei hi. Ih bawl theih bank pen Malaysia ah bank 2 bek om hi. Tua te ahih leh CIMB leh Public bank ahi hi. Abawl nuam akua mapeuh in nasep a neih kul a, boss pa/nu ii thauhkhansa (recommendation letter) bek tawh ki bawl thei ding hi. Abawl nuam akua mapeuh in ZRC zum ah boss pa/nu ii thauhkhansa (recommendation letter) leh UNHCR card copy (meihtu) nong ap na ding kong zasak uh hi.
Thauhkhansa (Recommendation Letter) Tung Ah Akul Hamtang Teng Tel Genna
  1. Thauhkhansa (Recommendation letter) tung ah sai/company min (letter head/ company/restaurant logo) tuan hamtang kul hi.
  2. Tua khit ciang in na omna tawh aki nai pen mun ahi kei leh na sepna mun tawh aki nai pen na mun Bank Branch address gelh kul hi. (Gentehna: CIMB pudu branch/Public Bank Pudu branch)
  3. CIMB ahong nuamte ading in boss te ii CIMB account numbat ki sam hi. Public bank a hong nuamte ading in kisamlo hi.
  4. Alai ah khasum piakna ding kisam ahihman in cihna lai ki helsak hamtang ding.
  5. Boss pa/nu ii sign (signature) ki sam hi.
  6. Sai/Company/restaurant ii chop/seal/stamp ki sam hi.

Atung aa dan ahih kei leh na lai pen hong ki sanglo ding hi. Bank tawh kisai atel beh nuam ih om leh ZRC zum ah nong pain a ding un kong theisak uh hi.

ZRC zum ah Zoniik, leh adangdang Niik hoih nono 2015 latest design hong tungta hi. Alei masa ahampha hi ding hi. Niik alei nuam peuh mah in aman lang thei pen in ZRC zum ah nong pai na ding un thu hoih kong puak uh hi. Taman Sri Kuching ah zong om hi. Niik tawh kisai ki zopna ding Syamah Dimboih 011-271 87622

Malaysia gam Kuala Lumpur khuapi ah Seventh Day Adventist (KLAC-Zomi Service) te ii makaihna tawh Gupna Bucing Crusade ki nei ding hi. Pasian thu a za nuam, a telnuam, azui nuam te’n KLAC pan crusade ah na pai ding un hong zawn uh hi.

Malaysia Zomi Crusade (A (2) Veina)
Thulu: Gupna Bucing
Speaker: Pr. PL Thlenga Chhakchhuak
Ani : 20-25 September 2015
Ahun : Nitaak nai 7:00pm-10:00pm
Amun : SDA (KL Zomi Service) Biakinn
No. 8-3A, Jalan Sungai Besi
57100 Kuala Lumpur.

Bus Contact No.
Sri Kuching : 011-211 22293
Sunway Mentari Court: 018-217 0026
Subang Jaya : 017-208 3197
Cheras Utama : 011-122 77718
Cheras Yulek : 012-918 7690

Lophei khua pan hi aa, Australia atung khin Pa Cin Do Dal te innkuan in minam a itna uh leh ih biak Pasian a zahtaakna uh tawh ZRC zum ading in RM 50 hongpia khia ahihman in ZRC zum pan ki lungdam mahmah hi.

  1. Ansai Ah Pasal Kideih
  2. Aksa Atna ah Pasal 1 Kideih
  3. KFC (KL leh Johor Bharu)

Atung aa kigelh nasep tuamtuam te baan ah adang nasep tuamtuamte na lunglut leh Nasep tawh kisai in Thursday ni sim in ZRC zum ah zingsang 11:00am in interview om den hi.


ZRC zum hon hun :
(Every day)
9:00am - 6:00pm
Email:
zrcmly@gmail.com
Fax/Tel:
039-224 7283
Download-ZRC Awging Lom 4, Hawm 07.PDF
at
Labels: , , , , ,