ZRC Awging Lom 3, Hawm 99 (02-Aug-2015)

Tukaal Thulu Te Tomlakna (na etnop pen meek ziau le cin)
  1. Kipawlna Makaite, Pawlpi Makaite Leh UNHCR Uliante Kimuh Khopna Kinei
  2. ZRC Zum Pan Bank Card Kibawl Kik Theita
  3. UNHCR Zumpi Pan UN Card Laaksak Kik Cih Thu Tawh Kisai
  4. Nottingham University Ah Sang Akah Nuamte Ading
  5. Australia Lam A Lunggulhte Ii Theih Ding
  6. Video Zaih Nuam Mopuan Kawmnuamte Ading Thuhoih
  7. Lungdam Kohna
  8. !!!Nasep!! Nasep!! Nasep!!!

July 28, 2015 ni in CDU (Community Development Unit)-UNHCR makaihna tawh UNHCR department tuamtuam pan uliante leh Kipawlna Makai, Pawlpi Makaite zingsang nai 9:30am in ki muh khopna ki nei thei hi.

UNHCR pan hong gen khiatna ah Malaysia gam ah gambeel in hong tung gam tuamtuam 52 pan gambeel mi nam kim hong tung hi ci uh hi. Tulai tak UNHCR card atawi Malaysia gam sung ah mimal 153000 om hi cih hong gen uh hi. Tua sung lak pan in kawl gam pan bekbek pen 90000 hi ci uh hi. Malaysia gam UNHCR zumpi pan kum 2015 sung gam 3na apai thei ding mimal 6500 hi.

UNHCR zumpi ah gambeel kiang pan lai a ngah bekbek uh ni 1 in UNHCR zum ah lai 200 val tung hi ci uh hi. Ni khat in UNHCR zumpi pan mimal 60 in UNHCR card thak ngah uh hi. Thong vai tawh kisai in tu kum sung January 1-July 27, 2015 kikal bekbek OPI (Outreach, Protection and Intervention) department UNHCR pan mimal 4200 val thong pan tan khia khin uh hi cih thu OPI pan ahi uliannu Asha in hong gen khia hi. Malaysia thong pen mun dang gam dangte sang in hoihlo zaw ahihman in mai lam hun ah tu aa sang in ham ciam zaw ding hi ung cih zong hong gen uh hi.

ZRC zum pan in Bank card kibawl kik theita cih thu hoih kong zasak uh hi. Abawl nuam akua mapeuh in ZRC zum ah na nasepna pan na pu/boss te ii company/restaurant logo tawh recommendation lai gelh sak unla ZRC zum ah nong ap na ding thu hoih kong zasak uh hi. Atel beh nuam ih om leh ZRC: 018-263 5184 tung ah ki dong thei hi.

Tulai tak Malaysia gambeel mi sung ah a thang pha diak ahi UNHCR zumpi pan UN card laaksak kik tawh kisai in a dik mah hi. Ahi zong in mi khempeuh aa ki mawk laak sak kiklo aa, thu omlo pi’n zong ki laak saklo hi. Gentehna: Card tettan toe ding in na pai ciang in zuau mi pawl khat in card tung ah a min thei nawnlo, a suah kum, ni leh kha, nu le pa min thei nawnlo ahi zong tangthu thei nawnlo cih te pawl khat na ki laak sak mah hi. Tua ahihman in kawlgam pan na pai khait na tangthu ahi zong na min, na suah kum cihte phawk gige ding ki sam mahmah hi. Deih loh pen in a zenzen in UN card hong kilaak sak kik a om leh ZRC zum ah nong pai ding kong zasak uh hi.

UNHCR zumpi pan leh Nottingham University te in gambeelte ading deihsakna tawh Nottingham University ah sang kah theih nang hong vai hawm uh hi. Tua sang ong khit ciang certificate ngah theih nang zong hong vai hawm sak ding uh hi. Sang ki pat ding hun: September 2015
Amun: Jalan Broga, 43500 Semenyih,
    Selangor Darul Ehsan, Malaysia.

Alunglut akua mapeuh in ZRC zum ah Form ki ngah thei ding hi. A nunung pen in August 20, 2015 khit zawh ZRC zum pan ki sang nawnlo ding hi.

Form hong ki tin (Minsayin) hong ki pia teng lakpan mimal 5 bek ki teel khia ding aa, ki kah sak ding hi. Kum 17-30 kikal bek in Form tin theih hi ding hi. Sang kahman paik kullo aa, ahi zong in lamsap, an nek, tui dawn ei leh ei hi ding hi. Kha 1 in RM 500 bei thei ding hi. Alung lut akua mapeuh in ZRC zum tawh nong ki zopna ding kong zasak uh hi.

Australia lam a lunggulhte in 842-Form ki gelh thei kik ta hi. 842-Form cih ciang in Australia a tung khinsa na pa/na nu/na pasal/ na zi/na ta/na sanggam te in hong sam nuam ahih kul hi. Mel theih ta nau sanggam neilo te in 842-Form ki shauh theilo hi.

842-Form a shauh nuamte ii theih ding thu pawl khat
1) Na min, 2) Na card numbat, 3) Na suah ni, kha leh kum, 4) Pianna khua, 5) Pa min leh Nu Min, 6) Pa leh Nu ii Pian kum, 7) Sang bang ciang zo, 8) Sang bang kum pan bang kum ciang dong sang kah, 9) Tu ma kum 10 in na nasep na mun teng, 10) Tu ma kum 15 in na om ngeina mun teng, 11) Malaysia tun ni, kha leh kum, 12) Kawlgam pan tai khiat kum, 13) Na omna mun (address) aki cing tak in theih ding, 14) Na phone numbat, 15) Kawlgam pan nong tai khiatna thu, 16) Kawlgam ciah kik leh cin bang hong ki cih tam?, 17) Kawlgam ciah kik leh cin kua in bang hong cih ding? 18) UNHCR card copy, Passport size maan 8 (letmat 1.5X2), 19) Hong sam dingte ii Min, Suah ni, kha leh kum, 20) Hong sam dingte ii omma (address) aki cing in leh a phone numbat uh, 21) Hong sam dingte in Australia ah citizen ngah khin maw ahih kei leh Permanent residence ngah khin? Cihte aa ki pan ki sam ahihman in a lunglut a shauh nuam peuh mah in ki ginh kholhsa in nongpai ding kong zasak uh hi.

Zomite Mopawi ih bawl ciang in Latest Design 2015 Mopuan hoih nono ih kawm nop leh Pandan Jaya veng ah om Latest Video HD zaih siam mahmah Sya Lianbawi 012-343 6675/039-201 2508 tung pan ki kawm thei hi cih thu hoih kong zasak uh hi. Mopuan hoih nono kawm bek hilo in Video zong zaih siam mahmah hi. Tua ahihman in Video zaih nuamte in zong ho pih thei hi. Lakhui zaih nuam, Movie zaih nuam, Picnic ah video amhat tayah ding in ki zaih nuamte leh Activity tuamtuam aziah nuamte in ki sam thei hi. Mopawi leh Video zong thuah kawm thei hi. Maibuu (Facebook) pan zong video a zaihsa te ahi zong mopuan aneihte ki en thei hi.

Facebook Min: Lianbawi (Photographer)
Facebook Link
Kizopna ding: Sya Lianbawi 012-343 6675
           039-201 2508

Haicin khua ah teng Pa Go Khaw Mang leh Nu Nian Sian Vung ii tanu Lia Niang Lawh Nuam Zomite a it a vei na leh Pasian a zahtaakna hang in ZRC zum ading in RM 50 hong pia khia ahihman in ZRC pan lungdam mahmah ung cih thu kong pulaak khia uh hi.

...................................................................................
Zato, MC, Clinic pai na ah apai theilo te ahi zong, Pau leh ham theih loh man in kamphen aki sam ahi zong ih om leh Sya Khanpi 010-972 0902, 012-622 2986 tungah huhna ki ngen thei den hi.
...................................................................................
Deih loh pen in Ki mat na tuah zenzen leh Sya Piang 012-776 3014, 012-622-2986 tung ah huhna ki ngen thei hi.

  1. Ansai Ah Mi 2 Kideih
  2. Setzong ah Numei 3 Kideih
  3. Warehouse Ah Pasal 1 Kideih
  4. Inn Khawi Ganhing Zuakna Ah Pasal 1 Kideih
  5. Water Pipe Factory Ah Pasal 1 Kideih
  6. Ice-cream Food Factory Ah Pasal 3 Kideih
  7. Chicken Rice Shop Ah Pasal 1 Kideih


ZRC zum hon hun :
(Every day)
9:00am - 6:00pm
Email:
zrcmly@gmail.com
Fax/Tel:
039-224 7283
Download-ZRC Awging Lom 3, Hawm 99.PDF
at
Labels: , , , , ,