ZRC Awging Lom 3, Hawm 95 (05-Jul-2015)

Tukaal Thulu Te Tomlakna (na etnop pen meek ziau le cin)
  1. ZRC Kum Cin Ki Teelna Hong Tung Kik Ding Hi Ta
  2. UN tawh Kisai Thu Tuamtuam
  3. Embassy Tawh Kisai Thu Tuamtuam
  4. Ki Gensiat Ahoih Lohna
  5. Lungdam Kohna
  6. !!!Nasep!! Nasep!! Nasep!!!

A sawtlo in Zomi zum ahi Zomi Refugee Committee (ZRC) kum cin ki teelna July 16, 2015 (Thursday) ki nei kik ta ding ahihman in Zomi a it a vei, sum leh paai lam enlo in itna veina tawh aki pia khia nuam a sem nuam, Zomite hamphat na ding ahi zong, khan tohna ding aa asem nuam Zomi sung pan akua mapeuh ZRC zum ah nong zasak na ding ih gam leh ih nam ading in veina tak tawh kong zawn uh hi.

UNHCR card ngahsa te UNHCR zumpi pan hong kisam ciang in ih tangthu (case) te lim tak ki gin huai mahmah hi. Mi khem tam tua ahihman in ni dang sang in hoih tak hong tel dot zaw uh hi. Dot dan dawng dan ding atheilo ih om leh zong ZRC zum ah ki dong thei aa huhna ki ngen thei hi. UN ah interview khin vai lem loh ciang ZRC zum hong tung pan te pen ki huh theih taktakna hamsa hi.

UNHCR card atawi te deih loh pen in hong ki mat zenzen leh na card tung ah na min, na card numbat leh na suah kum, ni leh kha te hoih tak na gen theih ding ki sam hi. UNHCR card atawi nailo kipawlna card bek atawi te deihloh pen in hong ki mat zenzen aa thong na tun leh UNHCR pan hong tan ding hamsa mahmah aa, thong sung ah kum bang zah om ding cih ki gen theilo ahihman in kawlgam ciah zawk ding hoih zaw hi. Kawlgam pan vai tuamtuam hang in nong pai kik nop leh lem zaw ding hi.

United States of America (USA) atung khinsa apasal, azi, innkuan pihte leh asanggamte in 93 Visa tawh asap nop uh leh ki sam thei hi. Asam nuam te in zong ahihna uh limtak lak zawh ding ki sam hi. Tulai tak in suahna lai (Birth certificate) min leh ih gen ki tuaklo cihte aa ki pan om niknuk ahihman in 93 visa interview na ah hong ki lim dot zaw ta aa, vai kai tuam zaw deuh ta hi. Interview tawh kisai in Embassy in pan mun hong lak sak ding aa, interview khit ciang in interview a on leh sisit ngak ding hi ziau hi.

P3 tawh asam nuamte ading in US atun zawh kum 5 a cin maa sung in sap theih hi bek hi. DNA hong ki sit hamtang ding hi. DNA sitna ah adik leh DNA sitna tawh kisai in sum bei khempeuh hongpia kik ding uh hi. Interview tawh kisai in IRC (RSC) pan pan mun hong la ding uh hi. Navai khempeuh RSC tung tawn ding hi.

ZRC Awging Lom 3, Hawm 94 Azom<<<<<<
Mi Hazate In Mi’ Hoihna Mulo
Thu sia gen nuam a sa leii, Gen in, ke’n zong na gen gawn ning, ci-a a pau bualbual leii pen sawltak James in mei a tawh kuang ahi hi ci hi. Mun khempeuh ah mei kuang sak kawikawi hi. Mi gen siasiate in mawh nei lote’ min dai sak ding bang awlmawh ding hiam? Van gik pua-a awn cip mite’ lametna leh hanna a suksiat hangin ama siatna abawl, khawl tuanlo ding hi. Mite a gendai ding bek mah lung hi mawh zaw hi. Khristian a kicite na ngawn in a siangtho a thupi a thumaan a deih huai nate en nuamlo in, a deih huai lo a kilawm lo nate khempeuh kai khawmin mun teng gam teng ah thang sak uh hi. Testimonies for the Church bu 5na, laimai 56, 57.
Hazatna Leh Mawh Zonna
Pawlpi mite’ lakah a ki-uk lo leiite om hi, cih ka gen ding na kasa hi. Zuau gen ding a lawp leiite om hi. A huau thualthual thei leiite zong om hi. Mi gensiat a uukte lakah thu theih nopna tawh a pau oma, amaute a hilh dinga Pasian in a sawl mite a muhdah mana a pau zong om hi. Hih bangin kilem lohna hong piang hi. Kim khatte in a theih gige uh zong genlo uh a, kim khatte lah mi dangte’ hoih lohna a theih khempeuh uh, a hih kei leh a upmawh uh gen zakk thanuam uh hi.

Thumaante zuau thu; thuhoihte thusia, khial lopi a khial a gen nopna lungsim tu-in nasia mahmah ahih lam ka mu hi. Pasian mi hi’ng a kicite’ om zia a muh ciangin Satan kipak mahmah hi. Mi tampi in amau’ kha a ding don lo-in, mi dangte gensiat ding leh mawh sak ding hun pha vil kiukiau uh hi. Mi khempeuh in kisap-na nei ciat uh a, hazatna tawh amau’ siatna ding khat peuh muh ding haksa lo hi. Amau leh amau thukhen manga kibawlte in, “Tu’n a thu mu ta hang. A kisian sak zawh loh ding uh mawh saknate amau’ tungah suan dih ni,” ci uh hi. Amaute in a hun hoih ngak khinkhianin gensiatna a lom pipi-in suah khia uh a, a neng a tawng pulaak uh hi.

Thu khat peuh a muh theihna ding uha a hanciam na uah ngaihsut thahat mite in amau leh mi dangte khemin a lauhuai mun tung uh hi. Kidawm lo-in thu khat peuh gen khia pak uha, a paute’ lungsim kilang khia a hih lam theilo-in, bangmah ngaihsun lo-in pau zialzial uh hi. Tua banga a pau khiat zialzialte uh gen thamlo a hih hangin Satan’ neucin lang tawh enin gen kikkik uha, tungtun cia a pha pen maulpi ci pha sak uh hi.

Thu leng sawn khempeuh kai khawma, mi dang khat’ zia leh tong muan mawhna a piang sak ding na khempeuh pholh khia-a, tuate amau’ siatna dinga zat nopna in Khiristian ki-itna a hi hiam? Khris’ thuzui khat a min dai sak, a siat sak theih ciangin Satan kipak mahmah hi. “Ih u ih naute a mawh sak pa” amah ahi hi. Khristiante in Satan’ nasepna huh ih hi hiam?

Na khempeuh a mu Pasian in mi khempeuhte’ ginat lohna leh lunggulhna ciat a muh hangin, ih khialhnate Ama’n hong thuakin, ih tha nem nate hong hehpih hi. Tua bang migitna leh thuak zawhna lungsim A mite in a neih ding Pasian in deih hi. Mi dangte’ khialhna leh ginat lohnate a pholaakna ah Khristian taktakte kipak lo ding uh hi. A deih huai a ngaih baangte kek a ngaihsut theihna dingun git lohna poinate amaute in kihei san ding uh hi. Mawh zonna khempeuh, mawh sakna kammal khempeuh Khristian’a dingin gim huai hi. Testimonies for the Church bu 5na, laimai 94, 96.

Ei Mahmah Kikawkna In Man Nei
Khristian hi’ng a cite khempeuh in, mi dangte’ khialhnate a gengen uh sangin, amau’ sung siat ah puah phat dinga kisam bang siatnate om hiam ci-a a kimuhna dingun a sittel siamna uh zang nuam zaw le-uh, tu ni-in pawlpi sungah cidamna om zaw ding hi. Topa in a suang manpha a khop ciangin, a thumaan, a thutang, a cihtakte, lungdamna tawh en ding hi. Tua bang mite’a ding lukhu a bawl dingin vantung mite kisawla, tua aksi a dim lukhute in, Pasian’ tokhom pana taang khia khawvakte tee selsalin leng khia kik ding hi.

Topa in A mite sittel hi. Nangma ginat loh-nate na ut bangbangin nakpi takin na kikawk thei ding hi; a hi zongin mi dangte’ tungah migi-in, hehpihna nei-in, thusiam in. Lungsim hoih a nei ka hiam, lungsim siapi a nei ka hiam ci-in nisimin kisit in. Hih thu ah khemna khempeuh pan hong hon khia dingin Topa cial in. Tawntung noptuamnate tawh kisai hi. Mi tampi tak in pahtawina ngai-in meetna a lunggulh lai takun, kong it sanggam aw, note in Pasian’ itna na ngahna dingun dieh takin zong un la, Kei hong kisapna leh hong kiteelna koi bangin kician sak thei ding cih kua in hong lak ding hiam? ci-in kiko un.
Zop lai ding<<<<<<<<<<<<<<<<

Taungzalat sai nei Pu Philip Mawngpi (RM 200), ZCF Canaan (Zomi Christian Fellowship) (RM 150), Pyidawtha khua pan ahi Cing Thaw Lian (RM 50) leh adang Zomite tung pan mah in (RM 100 + RM 50) Zomite a it avei na uh hang in ZRC zum ading in hongpia uh ahihman in ZRC zum pan in lungdamna lianpi ih pulaak hi.

Myanmar Believers Fellowship (MBF) pawlpi pan in June 30, 2015 (Tuesday) ni in RSC zumpi pan gambeel te vai tawh kisai in biakinn manh ngenlo in Zomite ading deihsakna mah tawh hong zangsak ahihman in Zomite ai tang in lungdam ih ko hi.

  1. Ansai Ah Pasal 2 Kideih
    2. Amun    : Kelana Jaya
    Ahun    :  Nai 10 sung
    Omna/An     :  Pia
    Kal 1     :  Ni 1 Off
    Kisap     :  Mikangpau
    Khasum     :  RM 1200
  2. Ansai Ah Mi 4 Kideih
    3. Amun     : Damansara Utama
    Ahun    :  Nai 9 sung
    Omna/An     :  Pia
    Kal 2     :  1 vei Off
    Khasum     :  RM 900
  3. Setzong ah Numei 3 leh Pasal 1 Kideih
    4. Nitha     :  RM 55
    Ahun    :  8:00am - 8:00pm
    OffDay     :  Sunday
  4. Khangha Kem Ding Ah Mi 5 Kideih
    5. Amun     :  KL khua sung lhe Penang
    Ahun     :  Nai 9 sung
    Khasum     :  RM 1200 + OT
    Omna/Lamsap     :  Pia
    Kisap     :  Mikang pau/Malay pau theih ding kisam,UNHCR card/laidal


ZRC zum hon hun :
(Every day)
9:00am - 6:00pm
Email:
zrcmly@gmail.com
Fax/Tel:
039-224 7283
at
Labels: , , ,