ZRC Awging Lom 4, Hawm 08 (27-Sep-2015)

Tukaal Thulu Te Tomlakna (na etnop pen meek ziau le cin)
  1. UNHCR Zum Ah Kipawlna/Pawlpi Makaite Leh UNHCR Uliante tawh Kimu Khawm
  2. !!!MEMSA Pan In Micina Kepdan Khoi Dan (Health Care Providers Training) Om ding!!!
  3. Syamah Hester Kiim Leh A Innkuan Pihte Lungdampihna
  4. Tg. Sanlian Lungdam Pihna
  5. ZRC In Tg. En Pi Angtang Pih
  6. ZRC Zum Ah Niik 2015 Latest Design Tuamtuam Hong Tungta
  7. !!!Nasep!! Nasep!! Nasep!!!

September 14, 2015 (Monday) ni in UNHCR-CDU (Community Development Unit) te ii vai hawm siamna tawh UNHCR zumpi ah kipawlna/Pawlpi makaite leh UNHCR uliante tawh muh khopna ki nei hi. UNHCR pan hong genna vuah, gam 3na atung khin Chin state bup pan in mimal 16000 kiim hita hi cih thu hong gen uh aa, August 17, 2010 maa in UN card atawi khin hi na pi’n RST aki sam nailo akua mapeuh UNHCR zum ah a manlang thei pen in hong zasak un hong ci uh aa, tu aa tawh kisai in August 17, 2010 maa aa UN card/laidal atawi te ading in nunung sapna (last/final call) hi ding hi cih zong hong gen uh hi. UN zum ah ei mah leh ei mah va pai aa va kan theih zong ahi hi. Huhna aki sap leh ZRC tung ah zong huhna ki ngen thei hi.

August 17, 2010 maa UN card/laidal atawi khit zenzen hang zi/pasal thak nei (New Marriage), ki teeng tawm panpan aa, a zi/pasal thak te’n a UN card uh August 17, 2010 khit ciang a ngah pan te ahih leh a zi/pasal thak hang in gam 3na lam tawh kisai in vai poi tuam mahmah ding hi.

Ahi zong in tun ki teeng thak (New Marrried) hi mah ta se leh a zi leh a pasal tuak in UN card pen August 17, 2010 maa in na ngah tuak hi leh vai poi om tuanlo hi. August 17, 2010 maa UN a lut lai in innkuan min, zi leh ta a koihsa te ading in hong tun hun2 ki lutpih thei lel aa vai poi om tuanlo ding hi. Ahi zong in hun bel zakai tuam ding hi.

August 17, 2010 khit aa UN card ngahte ading in Group case hi nawnlo aa, ei mah mimal mahmah ki sam in na case dung zui in hong ki sit tel tangtang ta ding hi. Pawl khat te pen August 17, 2010 khit ciang UN card a ngah pan zenzen hang a case hang maw, ahih kei leh damlohna hang maw ahih kei leh vai tuamtuam hang in a leng khin na om zel veve hi. Ahi zong in August 17, 2010 khit zawh UN card ngah thak te’n gam 3na a lung ih om leh UNHCR ah ei mah ngiat in hong ki pulaak un cih hong vai khak uh hi. Hong sam pah ding cihna hi tuanlo aa, UNHCR pan Mrs. Charlele ii gen dan ahih leh 2018 ciang aki sam theih ding in sayin ah hong gual sak ding cihna hi lai hi.

Tune Insurance Tawh Kisai
Tunes Insurance tawh kisai in nasemte aki laih lai tak hi aa, tun Tune Insurance nasem khawm thak ahi MI Care in mawh puak hong laaksak ta ahihman in Tune Insurance tawh kisai in vai poi mawh na neih uh leh William (MI Care) -012-249 3397 tung ah na koh ding uh kong theisak uh hi.

MEMSA Sang pen sang hoih mahmah khat hi aa, Cidamna lam tawh kisai kep dan khoi dan sinna ahi hi. Certificate (Laidal pi) zong hong kipia ding hi. Tua sang pan a ong peuhpeuh in US (America), Canada, United Kingdom ah khat peuhpeuh na tun ciang in zong cina kep tawh kisai in nasep hoih ki ngah thei ding aa, khasum zong hoih hi.

MEMSA Sang Akah Nuam Akua mapeuh ii theih ding:
  1. MEMSA sang pen Level in ki khen aa... Level 1 in Kha 6 sung sang kah kha ding hi. Level 1 zawh sial in certificate ki pia ding hi.
  2. Sang kah man Level 1 pen kha 6 sung hi aa, RM 500 hi ding hi. An leh Omna pia sa ahi hi.
  3. Akah nuam peuh mah in October 10, 20105 a nunung pen in ZRC zum 012-6222 986 ah min sayin pia aa Form nong ap kik ding ki sam hi.
  4. Sang kahna ding mun pen MEMSA Training Center, Bukit Beruntung ah hi ding hi.

ZRC sang khat ahi Shining Star Learning Centre (ZRSO) ah a sem Syamah Hester Kiim in September 24, 2015 ni in gam thumna (USA) gam nuam ah hong zuan santa hi. Amah pen kawl gam ah Buanman khua pan hi aa, Singunau ah teng hi. Syamah Hester Kiim in Zomi naupangno te sang kah loh a muh ciang in a lai tang na sa in, Zomi a it avei na leh Pasian a zahtaakna hang tawh (Shining Star Learning Centre) naupangnote pil sinna ding a mah a innkuan kuanpihte tawh ip sung sawk in hong hongkhia hi. Kum 2013 in ZRC tawh hong ki zom aa a mah ii nasep nate, Zomi naupangno te a deih sak ngiatna te pen et teh taak cing mahmah hi. Sang tawh kisai in Huhna koi pan mah ngahlo hi mah ta se leh lungkia cih bang omlo in a mah ip sung sawk in sang naupangnote pattah ngiat hi. A mah deih theih ding silh leh ten ten a ngawn lei ngamlo in Naupangnote ading aki pia khia Nupi pi cing et teh taak cing mahmah khat ahi hi ci in ZRC in ciam teh hi. Kum 2015, a len ma siah dong ZRC tawh maa pang khawm hi. Amah hang in Naupangno tampi tak te’n leitung pilna siamna bek thamlo, Khalam tawh kisai in a nungta Pasian theih lawh uh aa, thu nget dan aa ki pan hong thei toto lai uh hi. Syamah Hester Kiim Malaysia ah a om sung in amah nasep te ZRC in angtang pih mahmah hi.

Tg. San Lian (Pau San Lian) pen Saizang khua pan ahi Pa Langh Khan Dal ii Tapa U pen hi aa, Kawlpi khua ah teeng uh hi. September 22, 2015 (Tuesday) ni nitaak nai 10:00pm in Kuala Lumpur khuapi pan gam 3na (USA) gam nuam ah a innkuan un hong leng thei ahihman in ZRC pan ki lungdam pih mahmah hi.

Kum 2012-2013 sung in UNHCR zumpi sung Malaysia khangno bup kipawlna (Youth Collectives) ah Secretary pan mun hong letsak ahi hi. Amah om sung in Project tuamtuam ki bawlzo hi. Youth Cultural Show Project, Cultural Orientation project, bek thamlo in UNHCR zum sung ah Zomi min hong tawi sang hi. Kha sum cih bang omlo hi mah tase leh Zomite a it avei na ngiat tawh hong ki pia khia ngiat mi dik mi hoih khat ahi hi. Malaysia ah a om sung in ZRC te ii nasep tampi takte hong huh hi. ZRC in Tg. Sanlian ki angtan pih mahmah aa, Zomite ading nasem khat ahi hi ci in ZRC in ciam teh hi.

Tg. En Pi (Nang Khan En) pen Pa Nang Cin Thang ii tapa hi aa Sakhangyi khua pan ahi hi. Malaysia ah gambeel mah in om aa, tulai tak Kalana Jaya Paradigm Mall sung ah na sem hi.

August 2015 in kawlgam/Zogam ah tuikhang cih thusia a zak ciang in Zomite a it avei na ngiat tawh ZRC zum hong hopih pah in Sum le paai bek thamlo in, Zomi a it avei na hang in, tha tang leh mai zumna thuak in Malaysia gammi te kiang ahi zong, a lawm leh gual teng kiang ah kawlgam/Zogam tuikhang huhna ding in mai zum cih om sese nawnlo in hong na don sak hi. ZRC in Tg. En Pi pen Zogam/Zomi a it avei mahmah mi khat hi ci in ciam teh aa, angtang pih hi.

ZRC zum ah Zoniik, leh adangdang Niik hoih nono 2015 latest design hong tungta hi. Alei masa ahampha hi ding hi. Niik alei nuam peuh mah in aman lang thei pen in ZRC zum ah nong pai na ding un thu hoih kong puak uh hi. Taman Sri Kuching ah zong om hi. Niik tawh kisai ki zopna ding Syamah Dimboih 011-271 87622

  1. M&M Coffee Shop Ah Mimal 6 Kideih
  2. KFC (KL sung ah mi 8)


ZRC zum hon hun :
(Every day)
9:00am - 6:00pm
Email:
zrcmly@gmail.com
Fax/Tel:
039-224 7283
Download-ZRC Awging Lom 4, Hawm 08.PDF
at
Labels: , , , , ,